عومەر کەریم، ساڵی ١٩٤٧ لە گوندی گورگە چیای سەربە ناحیەی عەربەتی دەشتی شارەزووری پارێزگاى سلێمانى لە دایکبووە، گوندنشین و سەرقاڵی کاری ئاژەڵداری و جوتیاری بووە، تا قۆناغى سەرەتایی خوێندووە.
عومەر کەریم، ساڵی ١٩٦٦ پەیوەندى بە هێزى پێشمەرگە شۆڕشی ئەیلوولەوە کردووە و لە پەلی ئەحمەد سوریا وەیلی لە لقی یەک بە فەرماندەیی خالید ڕەباتی سەر بە بەتالیۆنی چواری قەرەداغ بەفەرماندەیی ملازم تاهیر شێخ ساڵحی هێزی قەرەداغی پارتی دیموکراتی کوردستان بۆتە پێشمەرگە. ساڵى ١٩٦٨ بەشداری شەڕی قەرەداغی کردووە، لەوشەڕەدا شێخ حسێنی باخچە شەهید بووە، ساڵى ١٩٦٩ شەڕی قەمچوغە و شەڕی جاسەنەی کردووە.
لە ١٥ی کانونی یەکەمی ١٩٦٩ عومەر کەریم و پەلێک لە هاوسەنگەرانی لە چیای قەرەداغەوە دابەزیون بۆ دەشتی شارەزوور بۆ ئەنجامدانی چالاکییەکی پارتیزانی لە ناحیەی عەربەت، بەڵام لە گەشتنیان بە گوندی بێسانسۆری دەشتی شارەزوور کەوتوونەتە بۆسەی سەربازانی عێراق و عومەر کەریم شەهید بووە، هاوسەنگەرێکی بەناوی سالار بەهمەن بە سەختی بریندار بووە، لەلایەن هاوسەنگەرانیەوە تەرمی شەهید عومەر کەریم دەگوازرێتەوە دەڤەری شارباژێڕ و لە گۆڕستانی گوندی بەرزنجە بە خاک دەسپێردرێت.
سەرچاوە:
١- ئەرشیفى دەستەى ئینسکلۆپیدیاى پارتى دیموکراتى کوردستان.
