ژیاننامە
عومەر رەسوڵ ئەحمەد رەسوڵ لە ساڵی ١٩٤٩ لە گوندی باویەی سەر بە ناحیەی باسرمە لە دایکبووە، گوندنشین بووە و سەرقاڵی کاری جووتیاری بووە، قۆناغی خوێندنی سەرەتایی تەواو کردووە، لە ساڵی ١٩٧٥ ئاوارەی وڵاتی ئێران بووە، دایکی ناوی حەلیمە سۆفی بووە و برایەکی بە ناوی سدیق و سێ خوشکی بە ناوەکانی فاتیمە، خەجیجە و زەینەب هەبووە، ساڵی ١٩٨٢ شەهید بووە.
خەباتنامە
عومەر ڕەسوڵ ئەحمەد ڕەسوڵ لە ساڵی ١٩٦٤ لە ماڵی عوسمان بەگ چەکی بردووە و پەیوەندی بە ڕیزەکانی شۆڕشی ئەیلوول کردووە و لە بەتالیۆنی سێی سەفین بە فەرماندەیی مام ڕەسوڵ فەقێ سەر بە هێزی سەفین بە فەرماندەیی موقەدەم عەزیز عەقراوی بووتە پێشمەرگە، دواتر لەلایەن عوسمان بەگەوە لە بەرامبەر بردنی چەکەکەی تەواوی ماڵ و ئاژەڵیان تاڵان کراوە، بەشدای شەڕەکانی چیای هەندرێن، چیای زۆزک، چیای سەفین، دۆڵی هیران و بالیسان، بەنی هەریر، شەڕی کەپکی شیشار، دەشتی بێتواتە و زەلکان کردووە.
لە دوای نسکۆی شۆڕش لە ساڵی ١٩٧٥ ئاوارەی وڵاتی ئێران بووە و لە ساڵی ١٩٧٧ کە گەڕاوەتەوە و ڕاگواستی خوارووی عێراق کراوە و لە ناحیەی شەنەفی سەربە قەزای ڕوومادی نیشتەجێ کراوە، لە ساڵی ١٩٨٠ گەڕاوەتەوە و پەیوەندی بە هێزی پێشمەرگە کردووە، لە ساڵی ١٩٨٢ بە فەرماندەیی هاشم باپیر هێرش دەکەنە سەر مونەزەمەی ڕژێمی بەعس لە هەریر، عومەر ڕەسوڵ لەو شەڕەدا بە سەختی بریندار دەبێت و لەلایەن هاوسەنگەرانی دەگوازرێتەوە بۆ دەڤەرێکی دوور لە شەڕ بۆ چارەسەرکردنی برینەکەی، دوای دوو کاتژمێر بەپێ ڕۆشتن لە نزیک گوندی خرواتان بەهۆی سەختی برینەکەی عومەر ڕەسوڵ شەهید دەبێت.
سەرچاوە:
ئەرشیفی دەستەی ئینسکلۆپیدیای پارتی پارتی دیموکراتی کوردستان.
