عوسمان ڕەحیم ئەحمەد ناسراو بە (عوسمان شێرە)، ساڵی ١٩٤١ لە گوندی پیرداودی سەربە ناحیەی شەمامکی قەزای قوشتەپەی پارێزگاى هەولێر لە دایک بووە، گوندنشین و سەرقاڵی کاری جوتیاری بووە، تا قۆناغى سەرەتایی خوێندووە،
عوسمان شێرە، ساڵی ١٩٦٢ پەیوەندی بە هێزى پێشمەرگەى شۆڕشی ئەیلوول کردووە و لە لقی عەلی شەریفی سەربە بەتالیۆنی دەشتی هەولێری پارتی دیموکراتی کوردستان بۆتە پێشمەرگە. ساڵی ١٩٦٢ بەشداری شەڕی گوندی پیرداود و ساڵی ١٩٦٣ داستانی قەرەچوغ و داستانی دارەبزمارەى کردووە. ساڵی ١٩٦٢ لە شەڕی گوندی پیرداود، کە هێرشێکى سەربازی سوپاى ئەوکاتی عێراق بووە بۆسەر دەستەیەک پێشمەرگە، عوسمان شێرە تێیدا بریندار بووە و بە برینداری خۆی دەرباز کردووە.
ساڵی ١٩٦٣ عوسمان شێرە و هاوسەنگەرێکى ویستوویانە بگەڕێنەوە چیای قەرەچوغ، بەڵام لە پشت گوندی قوچە بڵباس لە بناری چیای قەرەچوغ کەوتوونەتە بۆسەی سەرۆک جاشێکی ڕژێمی ئەوکاتی عێراق و لە سەرەتایی ڕووبەڕووبوونەوە، عەلی قادری هاوسەنگەرى شەهید بووە و عوسمان شێرە یەک کاتژمێر بە تەنیا بەرگری کردووە، بەڵام بەهۆی نەمانی فیشەک و پێداویستی شەڕ کردن لەلایەن جاشەکانەوە دەستگیر و هەر لە ناو گوندی قەچە بڵباس گولە باران کراوە و شەهید بووە.
سەرچاوە:
١- ئەرشیفى دەستەى ئینسکلۆپیدیاى پارتى دیموکراتى کوردستان.
