ژیاننامە
شەوکەت مەلا ئیسماعیل حەسەن ساڵى ١٩٣٧ لە گەڕەکى گوێژەى شارى سلێمانى لەدایکبوو، قوناغەکانى خوێندنى سەرەتاى، ناوەندى و دواناوەندى لە شارى سلێمانى تەواو کردووە، ساڵى ١٩٥٧ بەمەبەستى خوێندن لە کۆلێژى پۆلیس چووتە شارى بەغدا و لە ساڵى ١٩٦١ بە پلەى ئەفسەر کۆتایى بە خوێندنى ئاکادیمى خۆى هێناوە و دواتر لە پۆلیسى گەڕۆک دامەزراوە.
خەباتنامە
شەوکەت مەلا ئیسماعیل حەسەن ساڵى ١٩٦١ و دواى بەرپابوونى شۆڕشی مەزنی ئەیلوول، لە مانگى کانوونى یەکەمى ئەو ساڵە پەیوەندى بە ڕیزەکانى شۆڕشى ئەیلوولەوە دەکات، بە هۆی شارەزایى لە ئامێرى بێتەل لە بارەگاى بارزانى دادەمەزرێت و لە ماوەى دە ڕۆژ دەتوانێت دەزگاى بێتەلى شۆڕش لە نێوان بارەگاى بارزانى و هێزەکانى پێشمەرگە بەگەڕبخات و هەمانساڵ بووتە بەرپرسى دەزگاى بێتەلى شۆڕش.
ساڵى ١٩٦٢ توانى یەکەم شیفرەى بێتەلى لە نێوان دەزگاى بێتەلى ناوەندى لە بارەگاى بارزانى و هەموو بێتەلەکانى هێزى پێشمەرگە و بارەگاکانى پارتى دیموکراتى کوردستان درۆست بکات و تۆرى پەیوەندی نێوانیان دامەزرێنێت، بەم شێوەیە زۆرترین کردەوە و چالاکییەکانى هێزى پێشمەرگە و سەرکردایەتى پارتى لە دزەپێکردن پارێزران، پسپۆرێکى باشى هەبوو لە شیکردنەوەى شیفرەکانى بێتەلى هێزەکانى عێراق بۆ بەرژەوەندى شۆڕش.
ساڵى ١٩٧٠ و دواى ڕێککەوتننامەى ١١ى ئازار کرا بە فەرماندەى بەتالیۆنى سێی هێزەکانى پاسەوانى سنوورى و ئەرکى بەرپرسیارەتى هێزى کەرکووکى پارتى پێسپێردرا.
ساڵى ١٩٧٤ دواى پاشگەزبوونەوەى حکومەتى عێراق لە جێبەجێکردنى ڕێککەوتننامەى ١١ى ئازار و دەسپێکردنەوەى هێرشەکانى بۆ سەر شۆڕش، گەڕایەوە نێو هێزى پێشمەرگە و کرایەوە بە بەرپرسى دەزگاى بێتەلى شۆڕشى ئەیلوول، ساڵى ١٩٧٥ و دواى نسکۆى شۆڕشی ئەیلوول خۆى ڕادەستى حکومەتى عێراق کرد و دوورخرایەوە بۆ باشوورى عێراق بۆ شارى سەماوە، لە دوورخراوەیی وازى لە کوردبوونى خۆى نەهێنا و دەستى کرد بە دانانى فەرهەنگى زمانى کوردى بۆ کوردى، کوردى بۆ ئینگلیزى، ئینگلیزى بۆ ئینگلیزى.
دواتر لە ڕاپەرینى خەڵکى کوردستان لە ساڵى ١٩٩١ گەڕایەوە شارى سلێمانى و لە دواى دامەزراندنى حکومەتى هەرێمى کوردستان لە ساڵى ١٩٩٢ کرایە لیوا لە هێزى پۆلیس و ساڵى ١٩٩٤ لەسەر داواى خۆى خانەنشین کراوە و چووتە دەرەوەى هەرێمى کوردستان لە وڵاتى ئەڵمانیا نیشتەجێ بووە.
لە بەرهەکانى:
- ساڵى ١٩٨٥ فەرهەنگى کوردى بۆ ئینگلیزى.
- فەرهەنگى کوردى بۆ کوردی.
- فەرهەنگى ئینگلیزى بۆ ئینگلیزى.
- ساڵى ٢٠٠٦ وەرگێڕانى پەرتووکى توفیق وەهبى لە ژێر ناوى (ئێزدى میراتگرى میترایزم)
Yezeedees are the remnants of Mithraism.
- ساڵى ٢٠٠٧ فەرهەنگى کوردى بۆ کوردی شوانى داناوە.
- پەرتووکى ڕۆژانێ لە شۆڕشى ئەیلول (١٩٦١- ١٩٧٥).
- ساڵى ٢٠٠٨ فەرهەنگى کوردى بۆ ئینگلیزى مامۆستاى داناوە.
سەرچاوە:
ئەرشیفى دەستەى ئینسکلۆپیدیاى پارتى دیموکراتى کوردستان.
