ژیاننامه
شه‌هید سدیق حەجی حسێن باتیفی، ل سالا ١٩٥٢ ل باتیفا هاتیه سه‌ر دنیایێ، ل سالا ١٩٨٥ ده‌ما ئه‌نجامدانا چالاكییه‌كا شۆرە‌شگێڕی ل گرێ مغارا ل ده‌ڤه‌را شێخان شه‌هید دبیت.
خه‌باتنامه
شه‌هید سدیق حەجی حسێن باتیفی، د ژییه‌کێ گه‌نجدا و ل سالا ١٩٧٣ دبیته پێشمه‌رگه ل هێزا زاخۆ ب فه‌رمانده‌ییا عیسێ سوار، ل سالا ١٩٧٤ ده‌ما جاره‌کا دی له‌شکه‌رێ ئیراقێ هێرش ئینایه‌ڤه سه‌ر کوردستانێ، شه‌هید سه‌دیق ئێک ژ وان پێشمه‌رگا بوویه کو دگه‌ل هێزا زاخۆ، ل به‌تالیونا شه‌هید حه‌جی قادۆ گراڤی، به‌رسینگێ هێرشا دوژمنی گرتی و شه‌رە‌کی مێرانه ل گه‌لیێ زاخۆ و حه‌سه‌نه‌ڤا کری، ل هه‌مان ساڵێ شه‌هید سه‌دیقی پشکداری دڤان شه‌ڕان ژی دا کریه وەکو گرتنا ره‌بیا ده‌شتمرێ، گرتنا ره‌بیا دۆرنه‌خێ ل حوزەیرانا ١٩٧٤، گرتنا ره‌بیا چه‌م مشکۆی، شه‌ڕێن قه‌ره‌ولا و به‌رزێبارێ.
ل هاڤینا سالا ١٩٧٤ به‌تالیونا شه‌هید حه‌جی قادۆ گراڤی کو شه‌هید سه‌دیق ژی ئێک ژ پێشمه‌رگێن وی بوویه، تێته ڤه‌گوهاستن بۆ به‌ره‌یێن شه‌ڕی ل ده‌ڤه‌را باڵه‌کایه‌تی و ل به‌ره‌یێ گه‌وریا بێشێ چه‌په‌رێن خوه دگرن، ئه‌و ل وێرێ تووشی هێرش و بۆمبارانێن گران دبن و ئه‌و و چار هه‌ڤالێن خوه ل وێرێ د شه‌ڕە‌کێ گراندا بریندار دبن و شه‌هید سه‌دیق تێته ڤه‌گوهاستن بۆ نه‌خوه‌شخانایه‌کا مهابادێ ل رۆژهه‌لاتێ کوردستانێ ژ بۆ چاره‌سه‌ریێ، پشتی ئه‌و تێته چاره‌سه‌رکرن جاره‌کا دی دزڤریته‌ڤه به‌ره‌یێن شه‌ڕی ل ده‌ڤ هه‌ڤالێن خوه.
شه‌هید سه‌دیق پشتی شکه‌ستنا شۆرەشا ئه‌یلوولێ ل ئادارا ١٩٧٥ تێته باتیفا، لێ ئێدی باتیف نه ئه‌و باتیفا به‌رێ یا ئازاد و تژی ڕە‌نگ و سیمایێ کوردایه‌تیێ بوو، به‌لکی یا تژی بووی ژ له‌شکه‌ر، سیخوڕ و زه‌بانیێن دلڕە‌ش و دل ب کینێن داگیرکه‌ران. لەوما ژی بێهنا وی ته‌نگ دبیت و هه‌ستا ویا کوردایه‌تیێ دشاریێت، ئێدی ئه‌و ل ڕێکه‌کێ دگه‌ڕیت کو ده‌ست ب خه‌بات و شۆڕشه‌کا نوو بکه‌ت ژ بۆ پاقژکرنا کوردستانێ ژ داگیرکه‌ران.
پشتی هێدی هێدی چریسکا شۆڕشا گولانێ گه‌ش دبیت، ئه‌و ل هاڤینا سالا ١٩٧٦ خوه دگه‌هینیته کادرێن شۆڕشێ و ل گه‌ل هه‌ڤالێ خوه عەبدولعەزیز عەبدلرەحمان که‌شانی و هنده‌ک هه‌ڤالێن دی، دبنه ئه‌ندامێن ركخستنێن نهێنی یێن پارتی دیموکراتی کوردستان و ده‌ست ب کار و چالاکیان دکه‌ن ل دژی هێز و سیخوڕێن رژێما داگیرکه‌ر.
به‌ری کۆنگرا ٩ یا پارتی په‌یوه‌ندیا شه‌هید سه‌دیقی ل گه‌ل غازی زێباری ئه‌ندامێ ده‌سته‌یا هه‌رێما ئێک بوو و پشتی گۆنگرێ ژی ل گه‌ل د.جه‌رجیس حه‌سه‌ن به‌رپرسێ لقا ئێك بوو، ئێدی خه‌باتا وان گه‌له‌ک ئالی بخوه‌ڤه دگرتن وه‌کی کۆمکرن و ڤڕێکرنا زانیاریان ل سه‌ر لڤینێن دوژمنی بۆ پێشمه‌رگه‌ی، رێبه‌ری کرن ژ بۆ مه‌فره‌زێن پێشمه‌رگه‌ی ل ده‌مێ ئه‌نجامدانا چالاکیێن پێشمه‌رگاتی ل ناڤ باتیفێ و ده‌ردورا، به‌لاڤکرنا به‌لاڤۆکێن پارتی و شۆڕەشێ دناڤ باتیفا و زاخۆ و موسل دا و هه‌روه‌سا ئه‌نجامدانا هنده‌ک چالاکیێن له‌شکه‌ری ل ناڤ باژێڕا ل دژی هێز و سیخوڕێن دوژمنی، وه‌کی هاڤێتنا چه‌ند نارنجۆکه‌کا ل دژی دوژمنی ل ناڤ باژێڕێ زاخۆ.
ژ وان چالاکیێن پێشمه‌رگه‌ی یێن شه‌هید سه‌دیقی ڕێبه‌ری بۆ پێشمه‌رگه‌ی کری بۆ ئه‌نجامدانا وان، ده‌ست بسه‌رداگرتنا په‌زێ رژێمێ ل سیرکوتکی و مه‌لا عه‌ره‌بی، دانانا بۆسه‌یه‌کێ ل به‌ر له‌شکه‌رێ دوژمنی یێن کو ژ جهێن زێره‌ڤانیا سه‌ر جادێ دزڤڕینه‌ڤه باره‌گایێ لیوایا باتیفێ، لێدانا ڕه‌بیا گر داهۆلی ل ده‌ڤه‌را باتیفێ ل سالا ١٩٧٨، لێدانا باره‌گایێ رێکخراوا به‌عسیا ل ناڤ باتیفا ل سالا ١٩٧٨ و ئاگه‌هدارکرنا پێشمه‌رگه‌ی ل سه‌ر هاتنا سه‌رۆکێ ڕژێمێ سه‌دام حسێن بۆ زاخۆ کو دبیت بێته باتیفا ژی.
پێشمه‌رگه‌ی ژی ژ بۆ ڤێ ئارمانجێ ل ٢٢ێ ئادارا ١٩٨١ بۆسه‌یه‌ک ل زه‌مبیل فرۆشی ل رۆژاڤایێ باتیفێ دانا، هه‌رچه‌نده سه‌دام نه‌هات، لێ کاروانه‌کێ له‌شکه‌رێ دوژمنی که‌فته بۆسێ و هه‌ژماره‌کا مه‌زن ژ له‌شکه‌رێ دوژمنی هاتنه کوشتن.
هه‌لبه‌ت شه‌هید سه‌دیق تڤه‌نگه‌کا ڤه‌شارتی هه‌بوو، ده‌مێ وی رێبه‌ری بۆ پێشمه‌رگه‌ی دکر یان ل گه‌ل پێشمه‌رگه‌ی پشکداری د چالاکیێن له‌شکه‌ری دا دکر، وی ئه‌و تڤه‌نگا خوه ده‌رتێخست و بکاردئینا، ل سالا ١٩٨٢ پشتی برایێ وی مسلح ژ ئالیێ ئه‌منا به‌عسیاڤه تێته شه‌هیدکرن، ئه‌و خوه دگه‌هینیته ناڤ شۆڕەشێ و دبیته پێشمه‌رگه ل سنوورێ لژنا دهوکێ و ل گه‌ل رێکخراوا شه‌هید ئه‌حمه‌د حاجی حسێن، شه‌هید سه‌دیق ژ به‌ر زیره‌کی و چه‌له‌نگیا خوه ده‌ستپێکێ دبیته ئه‌ندامێ رێکخراوێ و به‌رپرسێ شانه‌یه‌کا سه‌ره‌کی یا پێشمه‌رگه‌ی و پاشی ژی دبیته جێگرێ به‌رپرسێ رێکخراوا رێنجبه‌ران و دوماهیێ ژی دبیته به‌رپرسێ رێکخراوا شه‌هید حه‌مید حه‌فزلا.
شه‌هید سه‌دیق دڤان سالێن کورتێن پێشمه‌رگاتیا خوه‌دا پشکداریێ د ده‌هان چالاکیێن له‌شکه‌ریێن مه‌زن دا دکه‌ت و دهه‌میا ژی دا رۆله‌کی به‌رچاڤ دگێریت. هه‌رچه‌نده وی پشکداری د گه‌له‌ک چالاکیان دا کریه وەکو:
-گرتنا بنگه‌هێن دوژمنی ل ده‌ڤه‌را باگێرا ل سالا ١٩٨٢، ده‌ستکه‌فتێن وان ١٢ دیل و ١٣ کلاشینکۆف وئارپیجیه‌ک و تۆپه‌کا ٦٠ملم و ده‌زگایه‌کی بێته‌لێ یێ ڕاکال بوون.
- گرتنا بنگه‌هێن دوژمنی ل ماسیکێ کو نوکه بوویه تاخه‌کێ دهۆکێ، ل ساڵا ١٩٨٣، ده‌ستکه‌فتێن وان ٥ دیل و ٩ کلاشینکۆف و ده‌زگایه‌کێ بێته‌لێ یێ ڕاکال بوون.
- دانانا بۆسه‌یه‌کێ ل سه‌ر ڕیا مانگێشکێ ل نێزیکی گوندێ حوجافا، ل ساڵا ١٩٨٣ ده‌ستکه‌فتێن وان ٦ کلاشینکۆف بوون.
- دانانا بۆسیه‌کێ ل سه‌ر پرا سادیا ل ده‌ڤه‌را مانگێشکێ، ل ساڵا ١٩٨٣، ده‌ستکه‌فتێن وان ٤ کلاشینکۆف بوون.
- لێدانا بنگه‌هێ دوژمنی ل زاویته.
- دانانا بۆسیه‌کێ ل ناڤبه‌را کۆرێن گاڤانا و گوندێ مه‌مانێ، ده‌ستکه‌فتێن وان ٧ کلاشینکۆف بوون.
- گرتنا بنگه‌هه‌کێ دوژمنی ل شه‌رانشێ ده‌ڤه‌را زاخۆ، ل سالا ١٩٨٣، ده‌ستکه‌فتێن وان ٦ کلاشینکۆف بوون.
- دانانا بۆسه‌یه‌کێ ل ناڤبه‌را زاویته و دهوکێ ل نێزیک گوندێ به‌رێ بهار ل سالا ١٩٨٤، ده‌ستکه‌فتێن وان ١٨ کلاشینکۆف بوون.
- به‌رسینگرتن و شکاندنا هێرشا مه‌زنا له‌شکه‌ر و جاشێن دوژمنی بۆ سه‌ر ده‌ڤه‌رێن هه‌ردوو لژنێن زاخۆ و دهۆک ل هاڤینا ١٩٨٤، کو شه‌هید سه‌دیق رۆله‌کێ گه‌له‌ک مه‌زن و به‌رچاڤ هه‌بوویه دشکاندنا هێرشێ دا ل به‌ره‌یێ گه‌لناسکێ و ژ به‌ر رۆلێ ویێ قاره‌مانانه ئه‌و هینگێ ب ده‌مانجه‌یه‌کا ١٤ خور هاته خه‌لاتکرن ژ ئالیێ لقا ئێک ڤه.
مخابن ل شه‌ڤا ٣ ل سەر ٤ێ حوزەیرانا ١٩٨٥ ده‌ما رێکخراوا وان یا شه‌هید ئه‌حمه‌د حاجی حسێن یا سه‌ر ب لژنا دهۆکێ ڤه و رێکخراوا شه‌هیدێن ده‌کان یا سه‌ر ب لژنا شێخان ڤه ب سه‌رپه‌رشتیا ئه‌مین نسری، هێرش بریه سه‌ر بنگه‌هێ دوژمنی ل گرێ مغارا ل ده‌ڤه‌را شێخان، ده‌ما ل ده‌ستپێکا هێرشێ شه‌هید سه‌دیق ل به‌ر دیوارێ بنگه‌هێ دوژمنی تێته شه‌هیدکرن، شه‌هید ئه‌مین نسری مسۆگه‌ر دزانیت کو ئه‌گه‌ر ئه‌و قه‌ستا ته‌رمێ شه‌هید سه‌دیقی بکه‌ت ئه‌و ژی دێ شه‌هید بیت، چونکی ئاگرێ تڤه‌نگێن دوژمنی یێ زاڵ بوو ل سه‌ر جهێ شه‌هید سه‌دیقی، لێ دیسان ژی ئه‌و ناخوازیت ته‌رمێ هه‌ڤالێ خوه بهێلیته دده‌ستێن دوژمنی دا، لەۆما ئه‌و ژی هێرش دکه‌ت و ئه‌و ژی دکه‌ڤیته به‌ر ته‌نشتا شه‌هید سه‌دیقی و شه‌هید دبیت، ته‌رمێ شه‌هید ئه‌مینی ل گوندێ نسرا ل ده‌ڤه‌را ئه‌ترووشێ و یێ شه‌هید سه‌دیقی ژی ل گۆفکێ ده‌ڤه‌را باتیفێ هاتیه ڤه‌شارتن، ئه‌و و هه‌ڤالێ خوه ئه‌مین نسری، کو هه‌ردوو ژی به‌رپرسێن هێرشێ و به‌رپرسێن ڕێکخراوێن له‌شکه‌ری بوون، هاتنه شه‌هیدکرن.
سەرچاوە:
ئەرشیفی دەستەی ئینسکلۆپیدیای پارتی پارتی دیموکراتی کوردستان.
