ژیاننامە
رەشاد خزر علی لە ساڵی ١٩٥٥ لە گوندی سیساوا لە دایکبووە، ئاستی خوێندەواری سەرەتایی بووە، لە سەرەتایی تەمەنی لاوی پیشەکار بووە. لە ساڵی ١٩٨٤ ناوبراو کچە ئامۆزایەکی خۆی دەستنیشان دەکات، بەڵام لەبەرئەوەى لە ساڵی ١٩٨٥ شەهید دەبێت، نایگوازێتەوە. دایکى رەشاد ناوى رەوشەن تەها بووە و کۆچی دوایی کردووە و خاوەنی دوو برایە بە ناوەکانی عەبدولواحید خزر، سەباح خزر.
خەباتنامە
لە ساڵی ١٩٧٧ پەیوەندی بە ڕێکخستنەکانى ناوچەی شوانی سەر بە لقی(٣-٤)ى پارتى دیموکراتى کوردستان دەکا، لەوکاتەدا کاک ئازاد بەرپرسی لق دەبێت. لە ساڵی ١٩٧٨چەک هەڵدەگرێت و دەچێتە دەڤەری قەرەداغ و پەیوەندی بە لقی (٣-٤) دەکات ، لە ساڵانی (١٩٧٨_ ١٩٨٢) بەشداریی کارای لە سەرجەم داستانەکانی دەڤەری قەرەداغ هەبووە. لە ساڵی ١٩٨١ لە دەڤەری شارباژێر بە سەختی بریندار بووە.
رەشاد خزر لە ساڵی ١٩٨٢ دەگوازرێتەوە بۆ لقی دوو و دەبێتە پێشمەرگەی مەفرەزەی لقی دوو، هەمان ساڵ لە سەرجەم چالاکییەکانى مەفرەزەی لق بەشدار دەبێت، لە دیارترینیان ئەو چالاکییانە گرتنی ڕەبایەی عەسکەری بەعسە لە گەڕەکی باداوانی شاری هەولێر کە تێیدا هەموو سەربازەکانیان بە دیلى بردبووەوە بۆ بارەگای لق لە دۆڵی بالیسان، هەروەها لە هەمان ساڵ لەگەڵ نۆ پێشمەرگەی هاوسەنگەری بە مەفرەزە دەچنە قەزای خەبات و سێ ئیستیخبارات بە دیلى دەبەنەوە بۆ بارەگای لق لە دۆڵی بالیسان. لە ساڵی ١٩٨٣ دەکرێتە بەرپرسی رێکخراوی سەفین سەربە ناوچەی شەقڵاوە و هەمان ساڵ لە داستانی قەندیل و داستانی قەڵاتۆکان بەشدار دەبێت.
لە ڕێکەوتى ١٢ی تشرینی یەکەمی ١٩٨٥ بە پلانی هەواڵگری رژێمی بەعس راپێچی بۆسەیەکی دوژمن دەکرێت لە سێ ڕیانی هەریر-باسرمە کە بە تەنیا دەبێت و قارەمانانە دێتە دەست و دەتوانێت چوار سەربازی (ئیستغبارات) بکوژێت و سیانیشیان بریندار بکات، بەڵام بەهۆی زۆری ژمارەی سەربازەکان لە کۆتاییدا شەهید دەبێت، سەربازانی ئیستغبارات تەرمەکەی لەگەڵ خۆیان دەبەن و تا ئێستاش گۆڕی نادیارە.
سەرچاوە:
ئەرشیفی دەستەی ئینسکلۆپیدیای پارتی پارتی دیموکراتی کوردستان.
