داستانی ئەحمەد ئاوا ١٩٨٧

ئەحمەدئاوا ناوچەیەکى جوانى گەشتیاریە دە‌كه‌وێته‌ دۆڵى زەڵم کە سەر بە ناحیەى خورماڵە لە پارێزگاى هەڵەبجە، لە ڕۆژهەڵاتى شاری سلێمانى هەڵکەوتووە به‌ دووری ٨٤كم، لە سەردەمى شۆڕشى گوڵاندا ئەو ناوچەیە گەلێک داستان و پەلامارى پێشمەرگەى بەخۆوە بینیوە کە هێرشیان کردۆتە سەر بنکە و بارەگا و مۆڵگە سەربازى و چەکداریەکانى حکومەتى عێراق، له‌ ئه‌نجامدا زەبرى کوشندەیان پێگەیاندوون و پەیامى زیندوویەتى شۆڕش و داکۆکیکردن لە مافى ئازادى گەلى کوردستان و پیادەکردنى دیموکراسی بە گوێدا چرپاندوون.        

هێزى پێشمەرگەى کوردستان لە ١ى تەمموزى ١٩٨٧ نەخشەیەکى توکمەی داڕشت کەوا هێرش بکەنە سەر چەند خاڵێکى سەربازى سوپاى عێراق و  هێزەکانى چەکدارى سەر بە حکومەت، به‌و ئامانجه‌ی كه‌ چالاکییەکى گەورەى پارتیزانى ئەنجام بدەن لە ئەحمەدئاوا و هانەى قۆل، دواى تەواوبوونى ئامادەسازى چالاکییەکە، هێزى پێشمەرگە هێرشێکى گەورەی کردە سەر سوپا و چەکدارانى بەکرێگیراو و سوپاى میللى (جەیشى شەعبى) لەو ناوچەیە، لە ماوەیەکى دیاریکراودا توانیان دەست بگرن بەسەر فەوجێکى چەکدارانى بەکرێگیراو (جاش) و فەوجێکى سوپاى عێراق و بارەگاى سریەى جەیشى شەعبیدا كه‌ له‌ ناوچه‌كه‌دا‌ بوونیان هه‌بوو.

لەو هێرشەى پێشمەرگەدا هێزەکانى حکومەتى عێراق زیانێکى زۆر گەورەیان بەرکەوت کە بریتى بوو لە سەدان کوژرا و و بریندار، وێڕاى ئەوەش نزیکەى ٢٢٠سەرباز و چەکدار لە هێزەکانى حکومەت بە دیل گیران، دەستکەوتى شۆڕش لەو داستانەدا بڕێکى زۆر چەک و تفاقى سەربازى بوو، بریتى بوو لە نزیکە هەزار پارچە چەکى جۆراو جۆر، شایانى باسە ناوچەکە بۆ ماوەى دوو ڕۆژ بە دەستى پێشمەرگەوە بوو دواتر پاشەکشەیان کرد و شوێنەکەیان بەجێ هێشت، دواى لێدانێکى کوشندە لە هێزەکانى حکومەتى عێراق لەو داستانەدا، هێزى پێشمەرگەش بێ زیان نەبوو بەڵکو حەوت پێشمەرگەى تێدا شەهید بوون بە ناوەکانى سەردار حاجی حسێن، شێخ کامل فریاسى، غەریب دۆڵە سوورى، عەلى مەلا، کاوە دەربەندى، قادر جەبار و حەسەن مارف.                

دیارە هەبوونى داستانى لەو جۆرەى هێزەکانى شۆڕش کاریگەرى گەورەى ئەرێنى لەسەر بەرزى ورەى پێشمەرگە هەبوو بە تایبەتى لە ڕووى متمانە بەخۆ بوون و هەست کردن بە بەرپرسیارێتى، لە هەمان کاتیشدا شکستێکى گەورەى سوپا و چەکدارانى حکومەت بوو کە خاوەنى هێزێکى زۆرى پڕ چەکى پێشکەوتوو، لە هەر  شەڕ و داستانێکدا زیانى گیانى ماددى و گەورە بە خۆوە ببینن.  

    سەرچاوەکان:  

1. مه‌سعود بارزانی، بارزانی و بزوتنه‌وە‌ی ڕزگاریخوازی كورد، به‌رگی چوارەم، 1975-1990 شۆڕشی گوڵان، به‌شی دووە‌م، چاپی یه‌كه‌م، چاپخانه‌ی ڕوكسانا، 2021.

2. ئەحمەد ئاوا https://ar.wikipedia.org/wiki/%D 

3. نورى حەمە عەلى، مێژووى تێکۆشانى پێشمەرگەیەک لە نێوان ژیان و مەرگدا، چاپى دووەم، چاپخانەى شەهاب، هەلیر - ٢٠١٦.