ژیاننامە
خدر عەبدوڵڵا ڕەسوڵ، لە ١ی شوباتى ١٩٣٦ لە شارى کۆیەى سەر بەپارێزگاى هەولێر لەدایک بووە، لە ١٢ی تەممووزى ١٩٧٦ بڕوانامەى بەکالۆریۆس لە کۆلێژى بەغدا خولى ٣٦ بەدەستهێناوە، ساڵى ١٩٧٥ دواى نسکۆى شۆڕشی ئەیلوول ئاوارەى وڵاتى ئێران بووە، هەمان ساڵ لەلایەن ساواکى ئێران زیندانى کراوە، پاش مانەوەى یەک ساڵ لە ئێران گەڕاوەتەوە عێراق و لەلایەن حکومەتى عێراق دوورخراوەتەوە بۆ شارى دیوانیە و ساڵى (١٩٧٨-١٩٨٠) بۆ شارى کوت دوور خراوەتەوە. بێجگە لەزمانى دایک زمانى عەرەبى و ئینگلیزى دەزانێت.
خەباتنامە
خدر عەبدوڵڵا ڕەسوڵ ساڵى ١٩٦٣ پەیوەندى بەهێزى پێشمەرگەى شۆڕشی ئەیلوول کردووە، لە هێزى چەمى ڕەزان بۆتە پێشمەرگە، ساڵى ١٩٦٥ بۆتە فەرماندەى هێزى تۆپخانەى شۆڕشی ئەیلوول و یاریدەدەرى مەلا مستەفا بارزانی بۆ کاروبارى تۆپخانە، بەشدارى چەندین خولى لە بوارى تۆپخانە کردووە، لەوانە ساڵى ١٩٦٠ خولى سنفى تۆپخانە بۆ ماوەى شەش مانگ، هەمان ساڵ خولى ئەحداس لە بەغدا، خولى (امراء الکتائب) لە بەغدا، ساڵى ١٩٦٢ خولى (مقاومة الطائرات) لە بەغدا، ساڵى ١٩٦٥ خولى ڕاهێنان لەسەر بەکارهێنانى هاوەنى ١٢ملم لە تاران، ساڵى ١٩٧٠ خولى (امراء السرایة).
لەچەندین شەڕ و داستان بەشدارى کردووە، لەوانە ساڵى ١٩٦٥ شەڕەکانى چیاى سەفین، چیاى کۆڕەک، ڕانیە، دەشتى هەریر، شەڕى خۆشناوەتى بالیسان. ساڵى ١٩٧٤ شەڕى سپیلک، ڕانیە، مەعەسکەر سەروچاوە، سەرکەپکان، لێدانى ڕەبایەى ماکۆک، لێدانى سوپاى عێراق لە چیاى کێوەڕەش. مانگى ئابی ١٩٧٤ دوو هەلیکۆپتەرى سوپاى عێراقى بە تۆپ خستۆتە خوارەوە. ساڵى ١٩٩٢ بەپلەى لیوا خانەنشین کراوە.
لەبەرهەمە چاپکراوەکانى:
- بیرەوەرییەکانم و تۆپخانەى شۆڕشى مەزنى ئەیلوول ساڵى ٢٠٠٣ بەچاپ گەیەنراوە.
- کارى دەباغى لە کۆیە ساڵى ٢٠١٩ بەچاپ گەیەنراوە.
سەرچاوە:
ئەرشیفى دەستەى ئینسکلۆپیدیاى پارتى دیموکراتى کوردستان.
