حەمەسەعید ئەمین محەمەد ناسراو بە حەمەسەعی ئەمین بەیجە، ساڵی ١٩٣٠ لە گوندی تەپەکەروسی سەربە ناحیەی سەنگاوی سەربە قەزای چەمچەماڵی پارێزگای سلێمانی لە دایکبووە، گوندنشین بووە و سەرقاڵی کاری جووتیاری و ئاژەڵداری بووە، تا قۆناغى سەرەتایی خوێندووە. خێزاندار بووە و خاوەنی یەک کوڕ و یەک کچ بووە.
حەمەسەعید ئەمین، ساڵی ١٩٦٤ پەیوەندی بە هێزى پێشمەرگەى شۆڕشی ئەیلوول کردووە، لە لقى عومەر میرزا سەربە بەتالیۆنی ٩ی شەهید دڵشادی هێزی خەباتی پارتی دیموکراتی کوردستان بۆتە پێشمەرگە. بەشداری شەڕی چیای گوڵان، شەڕی عەربەت، شەڕی چیای قەرەداغ و شەڕی حاجی ئۆمەرانی کردووە. دووجار بریندار بووە، ساڵی ١٩٦٩ لە شەڕی چیای گوڵان بریندار بووە و ساڵی ١٩٧٤ لە شەڕی حاجی ئۆمەران بە سەختی بریندار بووە و ماوەی سێ مانگ بۆ وەرگرتنی چارەسەر ڕەوانەی وڵاتی ئێران کراوە.
حەمەسەعید ئەمین لە ساڵی ١٩٦٨ پلەی سەرپەلی وەرگرتووە، لە دوای ڕێکەوتنی ١١ی ئازاری ١٩٧٠ پلەی عەریفی لە فەوجی پێنجی پاسەوانى سنوور وەرگرتووە، ساڵی ١٩٧٤ پلەی سەرلقی ٥ی لە بەتالیۆنی بەمۆی هێزی خەبات وەرگرتووە.
لە تشرینی یەکەمی ١٩٧٤ دوای گرتنەوەی چەند ڕەبایەیەکی سەربازی ڕژێمی ئەوکاتی عێراق لە کێوە ڕەشی چیای زۆزک لەلایەن تۆپخانەکانی ڕژێمەوە بە چڕی تۆپبارانی ڕەبایەکان کراوە و حەمەسەعید ئەمین شەهید بووە، لەلایەن هاوسەنگەرانیەوە تەرمەکەى دەگوازرێتەوە ناحیەی خورماڵ و لە گۆرستانی خورماڵ بە خاک دەسپێردرێت.
سەرچاوە:
ئەرشیفى دەستەى ئینسکلۆپیدیاى پارتى دیموکراتى کوردستان.
