لە ساڵی ١٩٧٧، بارەگای گۆڤکی و بیلمبێر سەر بە پێشمه‌رگه‌ی سەرکردایەتیی کاتی لە ناوچەی بەرواری باڵا نزیک یەکتر بوون. بارەگای گۆڤکی ژمارەیەکی زۆر پێشمه‌رگه‌ی تێدابوو، جگە لە مفرازەی حاجی قادۆ، مفرازەکانی محەمەد خالید بۆسەلی و محەمەد گۆدا هەبوون، کە زیاتر لە سەد پێشمه‌رگه‌یان لەو بارەگایەدا هەبوو، بە پێچەوانەوە، لە بارەگای بیلمبێر تەنیا مفرازەی ئەحمەد شانی هەبوو، لە ٢٥ی ئایاری ١٩٧٧، هێزێکی گەورەی سوپای ڕژێم، پێکهاتبوو لە ٥٠٠ ئەفسەر و سەرباز و بە پاڵپشتیی نۆ هێلیکۆپتەری گواستنەوەی سەرباز و فڕۆکەی شەڕکەری بێدەنگ (سەمتییە) هێرشیان کردە سەر بارەگای بیلمبێر لە سێ بەرەوە: ڕۆژهەڵات و ڕۆژئاوا و باشوور (هێلیکۆپتەری سەمتییە تازە لە فەرەنسا کڕدرابوو و یەکەمجار بوو سوپا دژی پێشمه‌رگه بەکاری بهێنێت)، شەڕ لە نێوان هەردوو لا هەڵگیرسا، دوای بیستنی دەنگی تەقە لە بارەگای گۆڤکی، حاجی قادۆ و محەمەد خالید و محەمەد گۆدا لەگەڵ نزیکەی شەست پێشمه‌رگه بۆ یارمەتیدانی هاوڕێکانیان کەوتنەڕێ، لە ڕێگاشدا تووشی هێرشی فڕۆکەکان بوون، لە نزیک بارەگای ئەحمەد شانە حەسەن هەجەر ئامۆزای حاجی قادۆ بە پلەی فەرماندەی مفرازە و پێشمه‌رگەیەکی دیکە بەهۆی بۆردومانی هێلیکۆپتەرەکان شەهید بوون، هەروەها میرخان و شەمۆ و سێ پێشمه‌رگەی دیکەی سەر بە حاجی قادۆ بریندار بوون. فڕۆکەکان بە بەرزییەکی کەم دەفڕین و تەرمی کوژراوەکانی خۆیان و تەنانەت تەرمی پێشمه‌رگه شەهیدەکانیشیان دەبرد، هەموو هێزەکە تەنیا یەک قاذفەی مووشەکی (ئار بی جی) و سێ گوللەی هەبوو. دوای بەکارهێنانی، فڕۆکەکان کەمتر بوێریی ئەوەیان هەبوو بە بەرزییەکی کەم بفڕن، کاتێک پێشمه‌رگەکانی سەر بە حاجی قادۆ و محەمەد خالید و محەمەد گۆدا گەیشتن، ئەحمەد شانە و زۆرێک لە پێشمه‌رگەکانی تەقەمەنییان تەواو ببوو.
بەڵام بەردەوام بوون لە بەرگری، بە گەیشتنی ئەم هێزە، پێشمه‌رگه پێگەکانیان لە بەرگرییەوە گۆڕی بۆ هێرش، توانییان ژمارەیەکی زۆر لە سەربازانی سوپا لە مەیدانی شەڕەکەدا بکوژن و سوپا ناچار بکەن پاشەکشە بکات. فڕۆکەکان تا دەکرێ تەرم و بریندارانی سەربازەکانی خۆیان و تەنانەت تەرمی زۆراب و پێشمه‌رگەیەکی دیکەی شەهیدیان لە مەیدانی شەڕەکە گواستەوە، هەروەها پێشمه‌رگەیەک بە ناوی ڕەسووڵ دۆسکی لەلایەن سوپاوە بەدیل گیرا و لەگەڵ خۆیان بردیان، لە ڕێگای گەڕانەوەدا ڕەسووڵ دۆسکییان بە زیندوویی لە فڕۆکەکەوە فڕێدایە خوارەوە و شەهید بوو.
شەڕەکە بووە هۆی شەهیدبوونی هەشت پێشمه‌رگه کە دووانیان تازە چووبوونە ڕیزەکانی پێشمه‌رگه، جگە لە چوار هاووڵاتی، نۆ پێشمه‌رگه‌ش بریندار بوون، لەوانە ساڵح سیتۆ و خودی ئەحمەد شانە، هەروەها عەلی هەرۆری کە یەکێک بوو لە پێشمه‌رگەکانی سەر بە ئەحمەد شانە، دوای ئەوەی دەیان گوللەی بەرکەوت شەهید بوو، هەروەها لە هەمان ڕۆژدا زۆران عەبدولعەزیز (ئەنوە) شەهید بوو، سوپای ڕژێمیش زیاتر لە ٤٥ بۆ ٥٠ کوژراوی هەبوو، تەرمی شەهیدان لەلایەن حاجی قادۆ و ئەفسەر محەمەد سوورانی و محەمەد خالید و محەمەد گۆدا و پێشمه‌رگه‌کانەوە گواسترایەوە بۆ گوندی ئارۆشی و لەوێ بە خاک سپێردران و پاشان گەڕانەوە بۆ بارەگای گۆڤکی.
ڕۆژی دواتر حاجی قادۆ بە هاوڕێیەتیی چوار پێشمه‌رگه بڕیاری دا بگەڕێتەوە بارەگای بیلمبێر بۆ هێنانی ئەو چەکانەی لەوێ بەجێ مابوون، بەم شێوەیە بەرەو بارەگای بیلمبێر کەوتنەڕێ، دوای ئەوەی چەکەکانیان کۆ کردەوە و هەڵیانگرت، بڕیاریان دا لەوێ نانی نیوەڕۆ بخۆن و پاشان بگەڕێنەوە بۆ دۆڵی شەهیدان، هەر لەو ڕۆژەدا واتە لە ٢٦ی ئایار چوار هێلیکۆپتەری سەمتییە گەڕانەوە بارەگای بیلمبێر کە حاجی قادۆ و هاوڕێ پێشمه‌رگەکانی لێ بوون، لەناکاو فڕۆکەکان لە پشتی دۆڵەکەوە دەرکەوتن و پێشمه‌رگه ئامادەیی یان دەرفەتی بەرگریکردنیان نەبوو، بەهۆی تەقەکردن و بۆردومانی فڕۆکەکانەوە حاجی قادۆ دەستبەجێ لە شوێنی ڕووداوەکە شەهید بوو.
ڕۆژی دواتر، واتە لە ٢٧ی ئایاری ١٩٧٧، سوپای ڕژێم جارێکی دیکە بە حەوت فڕۆکەی گواستنەوەی سەرباز گەیشتنە سەربازگەی گۆڤکی، دوای دابەزین سەربازانی سوپای ڕژێم هێرشێکی بەرفراوانیان کردە سەر هێزی پێشمه‌رگه، هەرچەندە هێزی پێشمه‌رگه ڕۆژی پێشوو فەرماندەکەیان و چەندین پێشمه‌رگەی قارەمانیان لەدەست دابوو، بەڵام بە ئازایەتییەوە بەرگرییان کرد و سوپای هێرشبەریان بە توندی تێکشکاند و ناچاریان کردن پاشەکشە بکەن.
دوای ئەم شەڕە، چەند مفرازەیەکی دیکە گەیشتنە دۆڵی شەهیدان و سەربازگەی گۆڤکی بۆ پاسەوانیکردنی شوێنەکە و گۆڕی شەهیدان، چونکە هەواڵیان پێ گەیشتبوو کە ڕژێم بەنیازە بە فڕۆکە بێتە ناوچەکە و تەرمەکان ببات، مفرازەکان بۆ ماوەی چل ڕۆژ لە ناوچەکە مانەوە تا دڵنیا بوون کە سوپا بۆ ئەو مەبەستە ناگەڕێتەوە.
سەرچاوە:١- ئەرشیفی دەستەی ئینسایکلۆپیدیای پارتی دیموكراتی كوردستان.