حەمەخان ئەمین حەمەکەریم، ساڵی ١٩٥٧ لە گوندی دەرگاشێخانی سەربە ناحیەی بیارەی دەڤەری هەورامان لە دایکبووە، گوندنشین بووە و سەرقالی کاری جوتیاری و باخداری بووە، تاقۆناغی سه‌ره‌تایی خوێندووه، دوای نسکۆی شۆڕشی ئەیلوول ئاوارەی وڵاتی ئێران بووە و لە کۆمەڵگای بارام ئاوا نیشتەجێ بووە. خێزاندار بووە و خێزانی ناوی شوکریە بووە و خاوەنی یەک کوڕ بووە بەناوی هێمن.
ساڵی ١٩٧٨ بۆتە پێشمەرگە لە هێزی هەورامانی پارتی دیموکراتی کوردستان. کە لەوکاتەدا نادر هەورامی فەرماندەی هێزەکە بووە و بارەگایان لە بێرەواس و کەیمنەی نێوان سنوری وڵاتی عێراق و ئێران بووە، بەژداری له چه‌ندین شه‌ڕکردووە لەوانه شەڕی کانی سێف و شەڕی چیای شەرام و شەڕی ئەحمەدئاوا و داستانی خواکورک، ساڵی ١٩٨٨ لە داستانی خواکوڕک شەهید بووە. هاوسەنگەرانی جەستەکەی دەگوازنەوە خاکی ئێران و لە دەربەند دزڵی بەخاکیان سپاردووە. باوكی ساڵی ١٩٦٣ شەهید بووە وهەروەها برایەکەی تریشی بە ناوی میرزا ئەمین لە ساڵی ١٩٨٨ لە کیمیابارانی شاری هەڵەبجە شەهید بووە.
سەرچاوە:- ئەرشیفی دەستەی ئینسکلۆپیدیای پارتی دیموکراتی کوردستان.