چالاکیە پارتیزانیەکانى پێشمەرگە تەنها لە چەند شێوازێکى وەک لێدانى ڕەبایە و بۆسە دانانەوە و ئاکارى لەم چەشنە قەتیس نەبوون بەڵکو هەر شێوازێکى کە پێشمەرگە بۆى لوابا لە دابەزینە ناوشارو بڵاوکردنەوەى پۆستەرو فراوانکردنى ڕێکخستن و لێدان و لەناوبردن و بە ئامانجگرتنی کەسانى ناپاک و بەکرێگیراو و کارمەندانى دەزگا ئەمنیەکان کە بەردەوام دانیشتوانى شار و لادێکانى کوردستانیان هەراسان دەکرد بە کردارى ناڕەوا و ئازاردانى دانیشتووى شوێنەکە .... هتد دەستیان لێ نەدەپاراستن.
ئەوەى دەمانەوێ لەم چەند دێڕی نووسینەدا لەسەرى بدوێین بە ئامانجگرتن کارمەندێکى فەرمانگەى ئەمنى ناو شارۆچکەى سیدەکانى دەڤەرى برادۆستە لەسەر دەستى پۆلێک پێشمەرگەى ئازا و گیان فیدا، کە یەکێک لە پێشمەرگەکانى بەشداربووى چالاکیەکە بە ناوى عبدولڕەحمان حاجى بۆى گێڕاینەوە: لە پایزى ١٩٧٨ لە ڕێکخستنە نهێنەکانى ناو شارۆچکە هەواڵ بە هێزى پێشمەرگە گەیشت، کە یەکێک لە کارمەندانى فەرمانگەى ئەمنی سیدەکان ماوەیەکە بێ گوێدانە بنەما و بەها ئایینى و کۆمەڵایەتیەکان، دەچێتە سەر کانى ژنان و چاودێریان دەکات و خۆیان لێ نزیک دەکاتەوە، ئینجا بۆ مەرامى بەدڕەوشتى بێ یان هەواڵگرى و هەرشتێکى تر، ئەوەش بەهیج جۆرێک لەگەڵ داب و نەریت و بنەماى ئایینى و بەها کۆمەڵایەتیەکان یەکناگرێتەوە، بۆیە دەنگى ناڕەزایی دانشتوانى لێ بەرز بۆوە چونکە ئەو جۆرە کانیانە تایبەت بوون بە ئافرەتان بۆ هێنانى ئاو و جێ بەجێکردنى پێداویستیەکانى ماڵ و نوێژکردن و... هتد، بۆ هیچ پیاوێک نەبوو کەوا لەو جۆرە کانیانە نزیک بێتەوە، بەڵام دام و دەزگاکانى ڕژێمى بەعس هیچ نرخی ئەو یاساو ڕێسا کۆمەڵایەتیانەیان نەدەزانى بەڵکو هەمیشە بەتەنگ چەسپاندنى سیاسەتى سەرکوتکاریەوە بوون.
کاتێ کە هەواڵ بە هێزى پێشمەرگە گەیشت کە دیاردەیەکى لەو جۆرە بوونى هەیە، دەستبەجێ مەفرەزەیەکیان پێکهنا بە فەرماندەى سەرکردەى سەربازى حەمیدە ئەفەندى، توانیان لە ماوەیەکى کورت بە نهێنى خۆیان بگەیەننە ناو شارۆچکەى سیدەکان، بەر لە کاتى هاتنى کارمەندەکەى ئەمن لە نزیک کانیەکە خۆیان مەڵاس دا و چاوەڕوانى هاتنى بوون، پاش ماوەیەک سەیریان کرد وەکو ڕۆژانى پێشوو تارماییەکانى بەدیار کەوت هێدى هێدى خۆى دەخزاندە لێوارەکانى کانیەکە، بەڵام ئەو جارەیان جیاواز لە جارانى پێشوو بێ ئاگا بوو لەوەى کە چیتر ناتوانێ مەرامەکەى دەستبەر بکا و بە قاچەکانى بگەڕێتەوە مۆڵگەکەى، لە چاوتروکانێکدا سێ کەس پڵنگ ئاسا بۆ ڕاوکردنى دەرپەڕین و پەلاماریانداو دەست دەم و چاو و قاچیان بەست، بێ دواکەوتن بەرەو سەرکردایەتى شۆڕش زۆر بە وریایی لەشار دەرچوون و گەیانیانە شوێنى بەمەست.
دواى ماوەیەک مانەوەى لە بارەگاى پێشمەرگەو ئەنجامدانى لێکۆڵینەوە لەگەڵى بڕیارى کوشتى درا و لەناو برا، هەرچەندە حکومەتى بەعس هاتە سەر هێل بۆ ئازاد کردنى بەڵام سەرکردایەتى شۆڕش گوێی لێ نەگرتن و ڕادەستى نەکردەوە، حکومەتىیش لە تۆڵەى ئەو یەکێک لە کەسە نزیکەکانى فەرماندەى پێشمەرگە حەمیدە ئەفەندى گرت و شوێن بزری کرد.
سەرچاوە:
دیمانە لەگەڵ عەبدولڕەحمان حاجى، خەڵکى باڵەکایەتى، پێشمەرگەى شۆڕشى گوڵان، بەشداربووى چالاکی، سۆران. ٢ى شوباتى ٢٠٢٦.
