دوای ئەوەی دۆخی عێراق گۆڕا، پەیوەندییەکانی نێوان سەرکردایەتی کورد و سەرۆک وەزیرانی عێراق عەبدولکەریم قاسم تێکچوو. لە ١١ی ئەیلوولی ١٩٦١، بڕیاری دەستپێکردنی شۆڕشی نەتەوەیی ئەیلوول دژی ستەمی حکومەت درا. بە هەڵگیرسانی شۆڕش، کاری حزبی و ڕێکخراوەیی جارێکی تر شێوەیەکی نهێنی وەرگرت و چالاکییەکان بە نهێنی بەردەوام بوون. حکومەتی عێراق دەستی کرد بە دەرکردن و دەستگیرکردنی ئەندامانی حزب، لەوانەش ئەندامانی یەکێتی قوتابیانی کوردستان بە شێوەیەکی بەرفراوان، بەتایبەتی ئەوانەی لە کۆلێژەکانی شاری به‌غدا و باشووری عێراق دەیانخوێند. لەم ماوەیەدا، ژمارەیەکی زۆر لە ئەندامانی یەکێتی قوتابیانی کوردستان، لە سەرکردایەتی ڕێکخراوەکەوە تا خوارەوە، پەیوەندییان بە شۆڕشەوە کرد و چوونە شاخەکانی کوردستان١.
بەڕێوەبردنی کۆنفڕانس
وەک ئەنجامی دەستگیرکردن و شەهیدبوونی هەندێک لە سەرکردە و ئەندامانی، لە ئاداری ١٩٦٢، بۆ ئەوەی خۆیان ڕێکبخەنەوە و هەڵسەنگاندن بۆ ئەو دۆخە بکەن کە بەسەر ڕێکخراوەکەدا سەپێنرابوو، یەکێتی قوتابیانی کوردستان کۆنفڕانسێکی نهێنی لە شاری به‌غدا ئەنجامدا و چەند بڕیارێکی دەرکرد. لەم کۆنفڕانسەدا، حەیدەر حەمزە بەردەوام بوو لە خەبات لە ڕیزەکانی یەکێتی قوتابیانی کوردستان وەک سکرتێر و نوێنەرانی کۆنفڕانس سکرتاریەتێکی نوێیان بەم شێوەیە هەڵبژارد:
١- سەروەر کاکە حەمە
٢- مەیمون دەباغ
٣- ئەحمەد شەریف لەک
٤- حەیدەر حەمزە
٥- فوئاد مەلا مەحمود
٦- عادل ناسر
٧- تەیب جەبار بەرواری
٨- حیكمەت خانەقینی٢.
گرنگترین بڕیارەکانی کۆنفڕانس بریتی بوون لە: پشتیوانیکردنی شۆڕشی کورد و سەرکردەکەی و پێشکەشکردنی ئەوەی لە توانایاندا هەیە بۆ هێزی پێشمەرگە. ڕێکخستنی قوتابیانی نوێ لە ڕیزەکانی شۆڕشدا. گرنگیدان بە بەشداریکردنی قوتابیانی کورد لە ڕێکخراوە پیشەیی و ئەکادیمییەکان٣.
سەرچاوە:١. ئەرشیفی ئینسایکلۆپیدیای پارتی دیموکراتی کوردستان.