ئەحمەد عەلی ئەحمەد ناسراو بە سەید ئەحمەد، ساڵی ١٩٤٧ لە شارەدێی تەوێڵەی سەربە ناحیەی بیارەی دەڤەری هەورامان لە دایکبووە، دانیشتووی تەوێڵە بووە وسەرقاڵی کەسابەتی ناو بازاڕی تەوێڵە بووە، تا قۆناغی سەرەتایی خوێندووە، لە دوای نسکۆی شۆڕشی ئەیلوول لە خەبات دانەبڕاوە و لەگەڵ هاوسەنگەرانی چۆتە وڵاتی ئێران. خێزاندار بووە وخێزانی ناوی بەهیە مەحمود بووە، خاوەنی دوو کوڕ و دوو کچ بووە بە ناوەکانی دانا، بەهمەن، مژدە، بێخاڵ.
ساڵی ١٩٦٧ بۆتە پێشمەرگە لە پەلی نەسرەدین تەوێڵەیی، سەربە لقی سێی بەتالیۆنی حەوتی بیارە به‌فه‌رمانده‌یی جەمال نامیق، سه‌ربه هێزی خەباتی پارتی دیموکراتی کوردستان بووە.
ساڵی ١٩٧٥ لە دوای نسکۆی شۆڕشی ئەیلوول لە خەباتی پێشمەرگایەتی دانەبڕاوە و لەگەڵ هاوسەنگەرانی چۆتە وڵاتی ئێران. هەروەها شێوەی پێکهاتەی هێزەکەیان گۆڕاوە بۆ هێزی هەورامان، به‌فه‌رمانده‌یی نادر هەورامی، ساڵی ١٩٨٣ لە کاتی ڕووبەڕوو بوونەوەیان لەگەڵ سەرباز و جاشی ڕژێمی بەعس لە کەرەجاڵی دەڤەری هەورامان، تۆپخانەکانی ڕژێم سەنگەری پێشمەرگەیان تۆپباران کردووە، لە ئەنجامی ئەم تۆپبارانە چەند تۆپێک بەر سەنگەرەکەیان کەوتووە و ئەحمەد عەلی شەهید بووە. دواتر هاوسەنگەرانی ته‌رمه‌كه‌یان بردۆتە گوندی ئەحمەد ئاوا و بە خاکیان سپاردووە.
سه‌رچاوه:- ئه‌رشیفی ده‌سته‌ی ئینسكلۆپیدیای پارتی دیموكراتی كوردستان.
